Эрчим хүчний үр ашиг, хэрэглэгч талын менежмент

Эрчим хүчний хэмнэлт, хэрэглэгч талын менежментээр дамжуулан эрчим хүчний нөөцийг хэмнэх, удирдах асар их боломж бий. Монгол Улс өнгөрсөн хугацаанд өсөн нэмэгдэж буй эрчим хүчний хэрэгцээг хангах нэмэлт эх үүсвэрүүд дээр төвлөрөн, эрчим хүчээр ханганb нийлүүлэх талд түлхүү анхаарал хандуулж ирсэн. Өөрийн өртгөөс доогуур тариф, хэрэглээнд суурилсан төлбөр тооцоо, тоолууржуулалт дутмаг, институтийн бүтэц сул байгаа зэрэг нь эрчим хүчний хэмнэлт, хэрэглэгч талын менежментийн арга хэмжээнүүдийг авч хэрэгжүүлэхэд саад учруулдаг. МЭХЗ хөтөлбөр энэ хүрээнд авч хэрэгжүүлж болох арга хэмжээнүүдийн талаарх ойлголтыг нэмэгдүүлэх, ханган нийлүүлэх талаас илүүтэйгээр хэрэглэгч талд чиглэсэн бодлогуудыг сурталчлахаар зорин ажиллана. Үүнийг дараах байдлаар хэрэгжүүлнэ:

•Energize Mongolia аянаар дамжуулан хэрэглэгчдэд хүрч, ‘хэрэглээг хэрэглэгчид удирддаг’ гэх зэргээр хэрэглэгчдэд эрчим хүчний хэрэглэгчийн хувьд хүлээсэн үүргийг тайлбарлах. Хэмнэлт, үр ашгийг эрчим хүч хэрэглэгчдийн өдөр тутмын амьдралын хэвшил болгохын тулд хэрэглэгчийн зан төлөвийг өөрчлөхийг зорьж байна.

•Эрчим хүчний үр ашиг, хэрэглэгч талын менежментийн хөтөлбөрүүдийг нэвтрүүлэхэд дэмжлэг үзүүлэх шаардлагатай бодлого, хууль, тогтоомж, зохицуулалт, дүрэм журмуудыг бэхжүүлнэ.

•Эрчим хүчний зохицуулах хороонд хэрэглэгчдийг урамшуулах механизмыг бий болгох, түгээх компаниудад зардлаа бүрэн нөхөхөд чиглэсэн дүрэм, журам боловсруулан гаргахад дэмжлэг үзүүлнэ.

•Хувийн салбарыг эрчим хүчний үр ашигтай тоног төхөөрөмж, хэрэгсэл, удирдлагын систем, бусад дэвшилтэт эрчим хүчний хэмнэлттэй технологиудыг ханган нийлүүлэхэд нь дэмжих зорилгоор хамтран ажиллана.

•Эрчим хүчний нөөц ашиглалт болон найдвартай ажиллагааны нэгдсэн төлөвлөгөөгөөр дамжуулан эрчим хүчний системийн төлөвлөлтийг сайжруулна. Уг төлөвлөгөөнд эрчим хүчээр хангагч талыг нэмэгдүүлэх хувилбаруудаас гадна хэрэглэгч талын менежментээр зардлын хувьд үр ашигтай байлгах хувилбарыг тоон үзүүлэлтээр харуулна.

•Хэрэглээнд үндэслэн шийдвэр гаргах явцыг урамшуулах, дэмжих зорилгоор шийдвэр гаргагч, үндсэн оролцогч талуудын чадавхыг бэхжүүлэх сургалт, үйл ажиллагаа, сургалтын аяллуудыг зохион байгуулна.

Эрчим хүчний үр ашиг, хэрэглэгч талын менежмент бол улсын эрчим хүчний хэрэглээ, улмаар нийлүүлэлтийг удирдахад аль аль талдаа үр өгөөжтэй арга юм. МЭХЗ хөтөлбөр нь энэхүү чухал хэсэгт томоохон нөлөө үзүүлэхээр төлөвлөн ажиллаж байна.