Л.Жамбаа нь Эрчим хүчний бодлого, зохицуулалт, сэргээгдэх эрчим хүчний чиглэлээр арав гаруй жилийн туршлагатай. Л.Жамбаагийн мэргэшсэн туршлага, манлайлал нь эрчим хүчний зах зээл, үнэ тариф, сэргээгдэх эрчим хүчний талаарх бодлого, зохицуулалтыг боловсруулахад чухал үүрэг гүйцэтгэсэн.

Монголын эрчим хүчний засаглал хөтөлбөрийн дэд захирлаар ажиллаж эхлэхээсээ өмнө тэрээр Эрчим хүчний зохицуулах хорооны Зах зээлийн судалгаа, хамтын ажиллагааны хэлтсийн дарга, Эрчим хүчний яамны “Азийн супер сүлжээ” төсөлд судалгааны инженер, Эрчим хүчний агентлаг, Түлш, эрчим хүчний яам зэрэг байгууллагуудад ажиллаж байсан. 

Эдгээр ажлын хүрээнд хариуцсан ажлаа чадварлаг гүйцэтгэснээс гадна NARUC, ERRA зэрэг ижил төрлийн үйл ажиллагаа явуулдаг байгууллагууд, ДБ, АХБ, ГОУХА, АНУ-ын ОУХА, ЖАЙКА, ЕСББ зэрэг олон улсын байгууллагуудтай хамтын ажиллагааг бэхжүүлж чадсан. 

Тэрээр Монгол Улсын Зүүн хойд Азийн супер сүлжээн дэх Монгол Улсын байр суурийг тодорхойлох чиглэлийн чухал судалгаа, арга хэмжээнүүдэд идэвхтэй оролцдог. Мөн сэргээгдэх эрчим хүчний төслийг өрсөлдөөнт сонгон шалгаруулалтаар сонгон хэрэгжүүлэх тогтолцоог бий болгох талаар Сэргээгдэх эрчим хүчний тухай хуульд нэмэлт, өөрчлөлт оруулах хуулийн төслийг боловсруулсан бөгөөд УИХ-аас тус хуулийн төслийг 2019 онд баталсан. Ингэснээр сэргээгдэх эрчим хүчний тарифыг бууруулах нөхцөл бүрдсэн юм. Мөн тэрээр Монгол Улсын эрчим хүчний салбарт тулгамдаж буй асуудал, тухайлбал эрчим хүчний тухай хууль, эрчим хүчний салбарын зах зээл, үнэ тариф, үр ашиг, сэргээгдэх эрчим хүч, эрчим хүчний хуримтлуур, зах зээлийн өрсөлдөх чадвар зэрэг өргөн хүрээний хэд хэдэн техникийн судалгаанд удирдах болон гишүүний үүрэгтэй оролцож байсан.

Л.Жамбаа нь МУИС-д Цөмийн технологийн чиглэлээр бакалавр, Сөүлийн үндэсний их сургуульд Олон улсын эрчим хүчний бодлого, эдийн засгийн чиглэлээр магистрын зэрэг хамгаалсан.

Др Овгорын Бавуудорж нь сэргээдэх эрчим хүчний бодлого, хөтөлбөрийн төлөвлөлт, хэрэгжилтийн чиглэлээр эрчим хүчний салбарт туршлага хуримтлуулсан салбарын тэргүүлэх мэргэжилтэн юм. Др О.Бавуудорж нь Инха их сургуульд эрчим хүчний инженерийн мэргэжлээр доктор, Техасийн Техас Тек их сургуульд салхины эрчим хүчний магистрын зэрэг хамгаалсан.

Тэрээр Сэргээгдэх эрчим хүчний үндэсний төв, Монгол Улсын Шинжлэх Ухаан Технологийн Их Сургууль, Эрчим хүчний яам зэрэг байгууллагуудад ажилласан туршлагатай. Др Бавуудорж нь “100,000 нарны гэр”, Дэлхийн банкны санхүүжилттэй “Хөдөөгийн цахилгаан хангамжид сэргээгдэх эрчим хүчийг ашиглах төсөл”, Азийн хөгжлийн банкны санхүүжилттэй “Сэргээгдэх эрчим хүчийг нэмэгдүүлэх төсөл”  болон “Эрчим хүчний системд ашиглах их чадлын цэнэг хураагуурын төсөл” зэргийг бэлтгэх, хэрэгжүүлэх ажлыг зохион байгуулахад голлох үүрэг гүйцэтгэсэн. Тэрээр АНУ-ын ОУХА, Дэлхийн банк, АХБ, ЕСБХБ, GIZ зэрэг олон улсын хөгжлийн байгууллагуудтай ажилласан туршлагатай. 

Түүнчлэн “Монгол Улсын үндэсний тодорхойлсон хувь нэмрийг шинэчлэхэд хүлэмжийн хийн ялгаруулалтыг бууруулах Техникийн зөвлөмж”, Зүүн хойд Азийн сэргээгдэх эрчим хүчний супер сүлжээ Говь-тех” зэргийг бэлтгэж хэвлүүлэхэд оролцсон. 

Намхайнямын Цолмон нь тогтвортой эрчим хүч, уур амьсгалын өөрчлөлтийг сааруулах төслүүдийг санаачлан хэрэгжүүлсэн 18 гаруй жилийн туршлагатай. Тэрээр уур амьсгалын өөрчлөлтийг сааруулах, цэвэр эрчим хүчийг нэвтрүүлэх төслүүдийг санаачлан уур амьсгалын санхүүжилтийг амжилттай татаж чадсан. Мөн түүнчлэн, хатуу түлшээр ажилладаг бойлерыг газрын гүний дулааны насосоор солих цэвэр дулаан хангамжийн төслийг санаачлан, улсын төсвөөр (720 сая төгрөг) жишиг төсөл болгон хэрэгжүүлсэн туршлагатай. 

Хатагтай Н. Цолмон нь уур амьсгалын өөрчлөлтийг сааруулах, дулаан хангамжийн шинэлэг технологи нэвтрүүлэх, хот суурин газрын агаарын бохирдлыг бууруулах чиглэлээр төрийн ба хөгжлийн байгууллагатай хамтран ажилласан туршлагатай. Парисын хэлэлцээрийн Үндэсний тодорхойлсон бичиг баримтыг боловсруулах, Эрчим хүч хэмнэх тухай үндэсний хөтөлбөр боловсруулах зэрэг бодлогын бичиг баримтууд дээр мөн ажилласан. 

Н.Цолмонгийн хамтран хэвлүүлсэн “Монгол Улсын ногоон эрчим хүчний тогтолцоо ба эрчим хүчний үр ашиг” тайланг эндээс унших боломжтой. Мөн тэрээр CCAC буюу Уур амьсгал, цэвэр агаарын түншлэлийн дэмжлэгтэй Монгол Улсад хэрэгжсэн агаарын бохирдол ба уур амьсгалын өөрчлөлтийг бууруулах чиглэлээр цогц арга хэмжээг тодорхойлох чиглэлээр бусад судлаачидтай хамтран ажилласан.

Мөнх-Эрдэнэ овогтой Энхжин нь нийтийн болон хөгжлийн хамтын ажиллагааны төслүүдэд дулаан хангамж болон эрчим хүчний үр ашгийг дээшлүүлэх асуудлууд дээр ажиллаж байсан туршлагатай. Тэрээр 2016 онд ШУТИС-ийн Эрчим хүчний сургуулийг үйлдвэр, хотын дулаан хангамжийн магистрын зэрэгтэй төгссөн. ЕСБХБ-ны “Улаанбаатар хотын төвлөрсөн дулаан хангамжийн системд СЭХ-ийг нэгтгэх судалгааны ажил”, ЕСБХБ-ны “УБ хотын ДХС-ийн үр ашгийг нэмэгдүүлэх ТЭЗҮ”, Дэлхийн Банкны “Улаанбаатар цэвэр агаар” төсөл, судалгаанууд дээр ажиллан ДХС-ийн эрчим хүчний системийн үр ашгийг нэмэгдүүлэхэд хувь нэмрээ оруулсан.

Мөн ЕСБХБ-ны Монголын Тогтвортой Эрчим Хүчний Санхүүжилтийн Үйлчилгээ зээлийн шугамын гол мэргэжилтнээр ажиллаж байх хугацаандаа олон тооны аж ахуй нэгж байгууллагуудын эрчим хүчний үйл ажиллагааг сайжруулахад тусалж байв. Дотоодод хэрэгжсэн төсөл хөтөлбөрүүд дээр ажиллаж байсан туршлагаас дурдвал, ГОУХАН-ийн Эрчим Хүчний Үр Ашиг 3+ төсөл, АХБ-ны УБ хотын гэр хорооллыг хөгжүүлэх хөрөнгө оруулалтын хөтөлбөр, УБДС ТӨХК-ийн дулааны тоолуурын алсын зайн мэдээллийн системийг бий болгох зэрэг төслүүдээр дамжуулан Монгол Улсын агаарын бохирдлыг бууруулах, уур амьсгалын өөрчлөлтийг бууруулахад чиглэн ажиллаж байсан. 

О.Шүрэнцэцэг нь Монголика, Үндэсний газарзүйн сэтгүүл, Космополитан зэрэг Монголын нэр хүндтэй хэвлэл мэдээллийн редакцийн багт ажиллаж, Монгол Улсын олон улсад чиглэсэн олон нийттэй харилцах санаачилгуудын бүтээлч агуулгыг тодорхойлох, хэрэгжүүлэх үйл ажиллагааг удирдан зохион байгуулахад оролцож, контентод суурилсан боловсролын төслийг санаачлан хэрэгжүүлсэн найм жил гаруйн туршлагатай. Одоогийн эрхэлж буй ажлаасаа өмнө Нэгдсэн Үндэстний Байгууллагад ажиллаж байсан.

МУИС-ийн олон улсын сэтгүүл зүйн анги төгссөн. Ёнсэй их сургуульд олон улсын стратеги санхүүгийн магистрын зэрэг хамгаалахдаа профессорын туслахаар ажиллаж байв.      

Б.Мэндбаяр нь нийтийн болон хөгжлийн хамтын ажиллагааны төслүүдэд төслийн загварчлал, шилжилтийн үеийн менежмент, хяналт шинжилгээ, үнэлгээний зөвлөх, чиглүүлэгч болон дотоод аудит, хөтөлбөрийн үнэлгээний чиглэлээр ажиллаж байсан туршлагатай.

МУ-ын уул уурхайн тэргүүлэгч компаниудын  хамтран гаргасан Хариуцлагатай Уул Уурхай (ХУУ)-н Кодексын загвар болох ХУУ-н шилжилтийн загвар ба үнэлгээний жишиг аргачлалыг боловсруулж уул уурхайн талаарх олон нийтийн ойлголтыг нэмэгдүүлэхэд хувь нэмэр оруулсан. Тэрээр хүртээмжтэй оролцоотой, системтэй цогц арга барилаар дамжуулан илүү үр дүнтэй хамтран ажиллах боломжтой гэдэгт итгэж байгууллагуудад төсөл боловсруулах арга зүй, хэрэгжүүлэх нөөцийн оновчлолоор мэдлэг  туршлагаа хуваалцдагаараа бахархдаг.

Тэрээр МУИС-ийн Олон улсын эдийн засгийн харилцааны бакалавар, Нийтийн удирдлагын магистрын зэрэг хамгаалсан ба уул уурхайн салбарын Жишиг Өөрчилсөн 50 Түүх номын дүрээр шалгарч байсан. 

Баатарцогтын Оюундэлгэр нь нягтлан бодох бүртгэл, санхүү, удирдлагын чиглэлээр 18 жил ажилласан туршлагатай. Тэрээр хүмүүнлэг, хөгжлийн янз бүрийн байгууллагуудад голчлон ажилласнаас гадна хувийн салбарт мөн туршлага хуримтлуулж,  хүмүүнлэгийн болон хувийн салбарын санхүүгийн менежментээр мэргэшсэн. Мөн үйл ажиллагаа, хүний нөөцийн менежмент зэрэг бусад менежментийн чиглэлээр давхар мэргэшсэн. Хэлэлцээр, бизнес төлөвлөлт, аналитик ур чадвар, менежментийн санхүү, стратеги төлөвлөлтийн ур чадвартай.

Базарсад овогтой Ганбат нь нягтлан бодох бүртгэл, санхүүгийн удирдлагын чиглэлээр 15 гаруй жил ажилласан туршлагатай. Германы Олон Улсын Хамтын Ажиллагааны Нийгэмлэгийн төслүүд болон Cуурин төлөөлөгчийн газарт санхүүгийн мэргэжилтнээр ажиллаж байсан бөгөөд дотоод хяналт, нягтлан бодох бүртгэл, бизнесийн удирдлага болон санхүүгийн менежментийн чиглэлээр мэргэшсэн.

Б.Уянгаа нь 2011 онд Их Британийн Кингстоны их сургуульд Санхүүгийн эдийн засгийн бакалаврын зэрэг хамгаалсан. Банк санхүүгийн салбарт хөрөнгө оруулалт, төслийн санхүүжилт, гадаад эх үүсвэр, олон улсын хамтын ажиллагаа чиглэлээр 12 гаруй жил ажилласан туршлагатай санхүүгийн эксперт юм. Тэрээр олон улсын хөгжлийн санхүүгийн байгууллагууд болон хөрөнгө оруулалтын сангуудаас  удаа дараагийн гадаад эх үүсвэртэй зээл, ногоон санхүүжилт болон худалдааны шугамын санхүүжилт татаж байсан туршлагатай. Abt Associates-д ажиллахаас өмнө тэрээр Богд банкинд Олон улсын хамтын ажиллагааны хэлтсийн захирал, Голомт банкинд ахлах менежер, шинжээч, хөрөнгө оруулалтын менежер зэрэг албан тушаалыг тус тус хашиж байсан.

Болдбаатарын Мөнхзул нь байгаль, хүрээлэн буй орчны чиглэлээр захиргаа, төслийн мэргэжилтнээр ажиллаж байсан туршлагатай. Б.Мөнхзул нь Озоны үндэсний албанд ажиллаж байх хугацаандаа “Озоны үе давхаргыг хамгаалах тухай Венийн конвенц”, “Озон задалдаг бодисын тухай Монреалийн Протокол”-ын хэрэгжилтийг хангах хүрээнд “Гидрохлорфторт нүүрстөрөгчийн (озон задалдаг бодис) төрлийн бодисын хэрэглээ, импортыг үе шаттай бууруулах менежмент” болон “Институцийг бэхжүүлэх” төслүүд дээр голлох үүрэгтэй ажилласан. Мөн жендэрийн эрх тэгш байдлыг сайжруулах хүрээнд   “Байгаль орчны салбар дахь эмэгтэй оюутнуудыг чадавхжуулах менторшип хөтөлбөр”-ийг амжилттай удирдан хэрэгжүүлсэн туршлагатай. Уг төслөөр дотоодын их дээд сургуулиудад байгаль орчны чиглэлээр суралцаж буй төгсөх ангийн эмэгтэй оюутнуудад зориулан ажлын байранд нэн шаардлагатай ур чадварт суралцах, салбарын шилдгүүдээр менторлуулах боломжийг бүрдүүлсэн юм. Тэрээр 2020 онд Унгар Улсын Обуда их сургуулийг Байгаль орчны инженер мэргэжлээр бакалаврын зэрэгтэй төгссөн. Түүний цаг төлөвлөх, хурал уулзалт зохион байгуулах, худалдан авалт хийх, түнш, харилцагч болон оролцогч талуудтай харилцах зэрэг олон талт ур чадварууд нь манай байгууллагын үйл ажиллагаа, алсын хараа, зорилгод үнэтэй хувь нэмэр оруулдаг.